قصيدة البشاير ..... لاحمد فؤاد نجم

كل ما تهلّ البشاير
من يناير كل عام
يدخل النور الزنازن
يطرد الخوف والظلام
يا نسيم السجن ميّل
ع الشجر وارمي السلام
زهّر النوار وعشش
فى الزنازين الحَمام
*******
من سكون السجن صوتي
نبض قلبي من تابوتي
بيقولولك يا حبيبتي
كلمتي من بطن حوتي
سلميلي ع الحبايب
ياحبيبتي سلميلي
كل حِب.. وله نصيبه من سلامي
.. بلغيلي
احضنى العالم عشاني
بين عيونك
.. وابعتيلي
نظره منها اشوف حبايبي
واشفي قلبي واسأليلي
*******
كل عالم فى بلدنا
كل برج.. وكل مادنة
كل صاحب من صحابنا
كل عيل من ولادنا
حد فيهم شاف علامة
من علامات القيامة
قبل ما تهل البشاير
يوم تمنتاشر يناير
لما قامت مصر قومه
بعد ما ظنوها نومه
تلعن الجوع والمذلة
والمظالم
والحكومة
*******
سلميلي ع الولاد السمر
خُضر العمر في عموم الحواري
سلميلي ع البنات المخطوبين
في المهد
لسرير الجواري
واسأليلي بالعتاب
كل قاري فى الكتاب
حد فيهم كان يصدّق
بعد جهل ..
بعد موت ..
ان حس الشعب يسبق
أي فكر ..
وأي صوت ..
*******
هى دي مصر العظيمة
ياحبيبتي .. هي مصر
اللي فضلتي فـ هواها.. عشنا
على ألف قصر
هى دي ياعزّة مصر

اشجينا يا معلم